و الله و الله واااااااااااااااااااااااااايد مشتاقه للمدونه و المدونيين بالذات
افتقدها وااايد .. ان شاء الله إني أرجع لها و أرجع أحط شي بسيط على الأقل
اشتقت لكم وايد :(
2016-10-15
2016-06-12
فكرة
السلام عليكم ورحمة الله وبركاته
شحالكم ؟؟
كيف الصيام وياكم ؟؟
و كيف أموركم ؟؟
الصراحة رغم اني خذت مادتين فالصيف توقعت اني بتعب
بس الحمدلله الصيام خفيف و ماشي تعب و لله الحمد
من فترة يت في بالي فكرة و الفكره هي
إني أخلي الصغار يرسمون أي رسمه في خاطرهم
و أطبع الرسمات على كفر تلفوني
وطبقت الفكرة
شو رايكم ؟؟
2016-05-26
تخطيط
السلاااااام عليكم و رحمة الله و بركاته
شحاالكم و شو أخباركم ؟؟
هاا شو استعداداتكم لشهر رمضان ؟
انزين انتوا تمتنون في شهر رمضان و لا تضعفون ؟
انا أضعف فوق ما انا ضعيفه هههههه ..
المهم
انا واااايد زعلاانه لانه ما عندي فوتوشوب :(
احس من زماان ما صممت ولا سويت شي
بعد ما رسمت و لا تدربت ع الخط
احس فيني طاقة بس اساساً ماشي وقت ضغط الدراسه و غيره
و احين خذت صيفي بعد و الله يوفقنا يارب
أمس كنت مخططه أدخل الكلية دلة شاي
بس للأسف انشغلت ..
و من الأساس ممنوع ندخل أكل الكليه..
لأنه كل ممنوع مرغوب .. و التمرد شوي حلو ههههههه
قررنا ندخل أكل و نحطه داخل شنطنا لأنه شنطنا كبيرة
و خططنا انا و البنات كيف ندخله و من وين و شو نييب معانا
و كل هذا صار فالمحاضره و الاستاذ يسمعنا بس ساكت
من خلصنا تخطيط قال انا علي آكل و بس ههههههههه
و أحين نتريا اللحظه المناسبه عشان ننفذ الخطه
و بدأ العد التنازلي
دعواتكم ههههههه
ماعندي وقت أحط أشكال مستعيله ههههههه
2016-05-16
عام
السلام عليكم و رحمة الله و بركاته
كييف الحال ؟؟
تقريبا مرت سنه و انا يوم عن يوم اقول بنزل شي فالمدونة و يصير شي و ما انزل فيها
لذلك قلت انزل هالتدوينة اسلم عليكم
اشتقت للمدونة وايد و ان شاء الله بس ارتب اموري و بنزل فيها كل شي أول بأول
ان شاء الله و بأذن واحد أحد
2015-07-01
رحلت يا بوي
أبي..،
سيبقى رحيلك وجعاً يمزقني
و هم لا يشعرون
وقفت بقبرك يا أبي وازددت شوقاً
و شوقي ليس يشمله فضاءُ
وكدت أقبل تربةً ضمتك فيها
وكدت أن أبكي، و لمَ البكاء؟
فقد فارقتنا لجوار ربٍ
أحاطك رحمةً ومنه القضاءُ
دعوتك ربي أن تحيط بقبره
رياض عطفك و أنت له رجاءُ
وأن تعفو وتصفح يا إلهي
فأنت الكريم وتفعل ما تشاءُ
وأن تسقيه جوداً شربة كوثرٍ
تروي ظماه ونعم السقاءُ
وأن تجبر وتمسح حزن قلبٍ
بكى شوقاً وعذبه البلاء
كلمات أختي : عائشة سرحان عامر الصوافي
يارب ارحم ابي و اغفر له و اجعل قبره روضة من رياض الجنة
2015-06-14
إلى آل ثاني " الجزء الأخير"
السلام عليكم ورحمة الله و بركاته
شحاااالكم ؟؟ و الله من متى ابا اكتب هالبوست
و كل مره أأجل هههههه
و كل مره اقول بقوم الصبح و بكتب و بخلص
لكن " النوم سلطان " 
انا ما ارقد واايد بس ربيعتي تقول لي الرقاد في مخباج
متى ما بغيتيه رقدتي هههههههه
حليلي
المهم اليوم بكمل لكم الجزء الأخير من رحلة قطر
أول ما قمت الفجر طبعاً كل عاده الكل راقد
و انا حليلي اتم واعيه
طبعاً في هالوقت شو سويت
امممممممم
طع من الملل شو قاعده اسوي هههههه
بعدين وعيت أختي و تجهزنا على السريع و نزلنا الحديقه
كان حللو هاليوم محد كان فالحديقه
و طبعا انا و اختي قعدنا نلعب و تمشيييت على البحر و حطيت رويلاتي فالماي
ووووووو جمعت صدف
هذا فيديو صورته على السريع .. ووو بعد قعدت أكتب اسماء ربيعاتي
و كتبت حرف "ح" كتبته بالجلي ديواني تعلمته يوم كنت آخذ دورات خط عربي
يا في بالي اكتب هالحرف و كتبته ههههه
انزين و بعدين لعبنا شويات
و بعدين رحنا تحوطنا فالفندق و اكتشفنا أماكن و أماكن فيه
و شفنا مكاان فيه لوحات فنيه جداً جمييييل المكان
و عقب رجعنا غرفتنا عشان نجهز باقي الأغراض
طبعاً انا انسدحت و قعدت أطالع قناة دزني عيبتني و الله
كلها افلام كرتون
حتظ صورت اسمها عشان اتم اتذكرها هههه
بعد ما خلصنا قررنا انه نتريق برا الفندق
و رحنا سوق واقف عشان نتريق و بالمره نشتري الهدايا
شدني وايد هالمكان لأنه جديم وايد و ما ترمم و المكان محد فيه بعد هذا اكتشاف كان ههههه
حبيت هالولاعات شكلهن حلوووو ما خلوني اشتري
اشتريت بيانو زجاجي حلو شكله ما عندي صوره له بس ان شاء الله بحط لكم صوره قريب
و البيانو فيه سمفونيه من سمفونيات بتهوفن جمييييييييل
و بعد ما خلصنا من سوق واقف
عاد رجعنا و خلصت الرحله ههههه
لالالالا في أحداث صارت في الدرب
و نحن رادين خطفنا بعد على مكان ثاني و ع فكره كنت راقده ههههه
كنت ناويه ارقد طول الدرب أعوض عن الايام اللي ما رقدت فيها
بس ودوونا البحر كان حلو
و يخوف بعد يعني المكان مافيه شاطئ بس نزلت
اووووه جميييل الصراحه
بعديين نزلت تحت
على فكره انا وايد اخاف من البحر بس احبه ههههه
يعني احس لو تعلمت السباحه مابخاف بس بعد اخاف اتعلم
يوم بتعلم السباحه بستوي 
و نحن في هالمكان أحمد اخوي حصل صدفه
شكلها غريب و حلوو
و بعدين هالصدفه صارت صديقة صدفاتي
ترا ع فكرة في صدف تحتتها هههههه
المهم بعدين روحنا من هالمكان الجميل
و ردينا
و الحمدلله اني شليت معاي كل العده
شليت اللاب توب و الآي باد و أدوات الرسم
طبعاً يوم طلعنا من قطر دخلنا السعوديه
فالسعوديه تخيلوا تمينا فالمركز لمدة ساعتين
و نحن بس فالسيد
كان وااااااايد زحمه المركز و تفتيشات فضيعه
طبعا في هذه الاثناء نحن نسولف و بعدين شغلت لهم
افلام كرتون و خطف الوقت و لله الحمد
و بعدين قعدت ألعب على الآي باد و مسوتلهم جوو حماسي ههههه
و بعدين و لله الحمد دخلنا الأمارات
و نزلنا نصلي
و نحن داخلين المسيد عشان نصلي كان في باص ما اعرف هالناس رايحين و لا رادين
المهم كانوا يبون يروحون السعوديه
المهم كنا نحن قاعدين داخل المسيد و في حريم رايحات و حريم داخلات
و نحن داخل المسيد قاعدين
إلا ولد هو ما كان صغير بس مب شاب يعني بين و بين فهمتوا صح هههه
هالولد دخل داخل المسيد و مسيد الحريم 
اول مره دخل سكتنا انا و اختي و بعدين مره ثانيه دخل
قلنا نعم نعم يعني مسيد حريم ليش تدخل فيه
قال و الله الحريم اللي فالباص قالن لي ادخل احط تلفوناتهن فالجارج
نعم يعني جد جد نعم مسيد حريم كيف تخلون هالولد يدخل
حتى لو هو في نظركم صغير هو فالآخر ولد و هالولد عمره تقريبا بين 10 و 12 سنه او كبر بعد
يعني مب صغير
بس ماعليه هالمره سكت و ما قلت شي
بس لو استوا هالشي مره ثاني بنازعهن
و بعدين كملنا دربنا و انا علظ نفس الحال
و وبعديين خلاص وصلنا البيت و لله الحمد
و تم بحمد لله و عونه
احس وايد اشياء ناقصه ههههه بس لو تذكرت بخبركم
2015-04-19
إلى آل ثاني 2
السلام عليكم ورحمة الله وبركاته
شحالكم اليوم و كل يوم نقول اليوم
من متى ناويه أكتب هالبوست
بس كنت زعلانه لأني ما شافرت هههههه
مريت في حالة حزن شديييد
و كل يوم أقول بكمل و بكمل لكن كل مره يصير شي و لا أكتب
المهم اليوم قررت إني اكتب و اتحمس للكتابه
لذلك بكمل لكم السالفه
طبعاً أول ما قمت الفجر و الكل راقد و انا حليلي
قاعده و كنت نشيطه
و طبعاً اكتشفت قناة عجيييييبه كله اللي فيها أفلام دزني
كان أحلى شي الصراحه
طبعاً يوم شفت النشاط اللي فيني و جيه يعني
قلت خلني أرسم و استمتع و في نفس الوقت أرسم
معلم من معالم قطر
لذلك قررت أرسم " فنار الدوحة "
ترتبط كلمة "فنار" بمبنى مركز قطر الثقافي الإسلامي من ناحية الهندسة المعمارية والموقع المتميز له الكائن بمنطقة الأسواق قريبا من شاطئ مدينة الدوحة "كورنيش الدوحة" ليكون كمنارة تهدي النفوس الحائرة إلى بر الأمان على غرار المنارة التي تهدي السفن إلى المرفأ الآمن وسط البحر حيث ينصب عادة. "الفنار" أو ما يعرف بالمصباح المضئ على سارية كبيرة أو برج مرتفع لإرشاد السفن في عرض البحر إلى طرق الإبحار والشواطئ الآمنة
طبعاً صورة الرسمه في كل بقاع الدنيا القطريه هههههه .. في كل مكان الصراحه صورتها
من خلصت الرسمه و كل شي قعدت أطالع القناة اللي اكتشفتها
و بعدين خواني قاموا و قررنا نروح لسوق واقف
و رحنا بعد لمتحف الفن الإسلامي
و يوم رحنا لسوق واقف اكتشفت اكتشاف عظيم
هذيل الصور قبل الاكتشاف
حبيت هالتحفه... عيبني شكلها واايد 
هذا دخلنا محل كل شي بالزجاج وااايد حلو ما شاء الله تبارك الرحمن
و حبيت هالتحفه واااايد .. وايد أحب هالسوالف 
و هذي صورة ثانيه للرسمه ههههه
و هذا اكتشافي العظيم ههههه .. كنا شاردين 
و بعدين لحقونا
المهم هالمكان في واقف بس القسم اليديد
وااايد حلو ما شاء الله
و هذا الاكتشاف الثاني
.. محل الايس كريم امممممم لذيذ
.. محل الايس كريم امممممم لذيذ
المحل كان في مكان منخش المهم اني وصلت له و طبعا شفت هالشكل
و شليته لو كان بيعطيني اياه والله وايد زين ههههه
بس قعدنا نلعب فيه أنا و اختي و أحمد 
و هذا الآيس كريم اللي خذته " آيس كريم رمان " لذيذ ما شاء الله
و أختي خذت الآيس كريم اللي فيه أكثر من نكهه 
بعدين قررنا نروح للمتحف
هذا برا المتحف
و هذا جدام المتحف
و هذا من داخل
المتحف الصراحه حلو .. بس يبالكم همه عشان تشوفون كل شي و تتحملون المشي
هو ما شاء الله 4 طوابق
و كل طابق و كل قسم فيه شي معين
و طبعاً هو كله عن الحضارة الإسلاميه
و الفن الإسلامي بأنواعه
و الصراحه انا صورت واايد صور بس بحط لكم كمن صوره بس
هالصورتين للمتحف من داخل .. وايد حلو ما شاء الله
بعد المتحف ردينا الفندق و طول الوقت نحن نفكر وين نتغدا
آخر شي قلنا بنتغدا في مطعم من المطاعم الموجوده فالفندق
رحنا لمطعم موجود فالطابق 11 و في هالطابق ماشي غير هالمطعم
طبعاً دخلنا و المكان كلللللللله ظلام .. ما ادري شو هالجو الماصخ
المهم
قالوا لنا اونه شووو ما عندهم أكل و انه بيفتحون وقت العشا 
شو فايدتهم ما ادري >> انا يوعانه و ما اتحمل هالحركات
المهم بعدين نزلنا تحت و رحنا لمطعم و طبعاً طلبنا أشياء خفيفه يعني سمبوسه و هالسوالف
و في أثناء تجهيز الأكل
طلعنا للحديقه نشوف الغروب
هذا و نحن قاعدين فالمطعم
و هذا يوم طلعنا للحديقه
و بعد ما أكلنا و شبعت ما شبعت اصلاً .. بس أوني شبعت ههه
رجعت للغرفه و قلت برقد بريح شوي
و طبعاً رقدت لين وقت العشا
و خواني راحوا للعرس .. كان عرس ربيع حمد و العرس كان في نفس الفندق اللي قاعدين فيه
يوم صار وقت العشا أختي وعتني طبعاً اكره شي انه حد يوعيني من النوم
ما يخلون الواحد يستمع بأحلامه الجميله لازم حد يخرب
طبعاً قمت و انا معصبه من خاطري عليهم هههههه
و رحنا للمطعم اللي ما عندهم أكل هههههه إلا ما اجربه
هذا المطعم من داخل كله ظلام
يعني كيف اشوف الأكل !! .. بس أكلهم حلو لا بأس به
طلبت من عندهم تبوله و مشاوي و حمص و هالسوالف يعني
انا ما اعرف ليش طول الرحله ما كنت أشبع يوم آكل .. ما ادري ليش يمكن عشان الرجيم اللي أسويه ههههه
المهم وبعدين كل واحد رجع لغرفته
و خواني يحوطون كالعاده
و بعدين اييه اللي حصل
انا ما رقدت قعدت أطالع قناتي الجميله و بعدين قلت خلني اشوف الدنيا
من البلكونه و شفت الدنيا كللللها عيناويه ما ادري شو السالفه
بس حبيييت اللون 
هذي صوره لجزء من الفندق من فوق
و هذا المباني المقابله للفندق
الصراحه ما اعرف ليش كل شي عيناوي .. بس حبيت اللون
و بعدين قعدت أطالع أفلام كرتون لييين رقدت
و تصبحون على خير 
باقي آخر يوم و نكمله في يوم ثاني ان شاء الله
الاشتراك في:
الرسائل (Atom)