و نبدأ عام جديد

السلاام عليكم ورحمة الله و بركاته

شحالكم ؟؟

و شوووو أخباركم ؟؟

طبعا هذا الأسبوع كان أول اسبوع دوام من هالسنه

و هذي آخرسنه لي فالكليه

طبعا دايما يكون أول اسبوع متعب نوعا ما

و أكثر شي أول يوم

بس الغريب انه أول يوم كان نشاط زايد فيني بشكل مب طبيعي ماعرف ليش !!!

ثاني يوم كان عادي ثالث يوم كان جدا متعب رابع يوم رجعت البيت من وقت قبل لا يخلص الدوام

و خامس يوم إجازه

و لله الحمد اللي يدرسوني كلهم أساتذه أوكي

قبل كنت واايد متخوفه من الاستاذ اللي راح يدرسني ديزاين لأني ما كنت احبه و انقال عنه كلاام وايد بس الحمدلله ما يدرسني

و المس اللي تدرسني ديزاين يعني هيه زينه و اسلوبها حلو و كل شي زين لكن مشكلتها انها ما تضغط علينا ولا شي يعني تعطينا البروجكت و تقعد ولا تسأل عنا ولا شي طبعا نحن نستغل الفرصه و نقعد نسولف و عادي

ف في أول يوم دوام قاعده أقول حق وحده من البنات أحين كل الاساتذه اللي يدرسونا طيبين و كل شي فيهم زين في منو بنسوي مقالب ؟؟

السنه اللي طافت كانت شي مس تدرسني ديزاين ياربي كيف كانت تقهرني و ترفع لي ضغطي

و طبعا انا و ربيعاتي نخطط شو نسوي فيها اليوم ؟؟

فمره من المرات سكرنا باب الكلااس و الباب ماينفتح غير بالباسوورد و طبعا لين اي حد و يفتح الباب يباله وقت المهم كان القصد من هالحركه انه نضيع وقت الكلااس لأنه نحن في هذاك الكلااس كنا بنخلص البروجكت اللي علينا و يوم بنقول لها خلصنا بتهزأنا ليش خلصتوا !!! يعني ما نخلص

و مره بعد كانت قاهرتني من الخاطر كنت افكر اسوي فيها شي خطير بس المشكله انا ما اقدر انفذ بروحي لازم البنات وياي خخخخخ و البنات قلبهن طيب قالن لاا و كيف و يمكن يستوي فيها شي قلت لهن انزين يلا عطونا نسوي شي فيها

فقالت وحده نحط علوك " علك أو لبان " فالكرسي مالها قلت لهم اوكي يلاا

رحنا و حطينا فالكرسي علوك طبعا هيه شافته و قالت منو حاط العلوك فالكرسي و العلوك جديد يعني قبل تقريبا ربع ساعه منحط ؟؟

طبعا انا ماسكه اللاب ولا حاطه شي في بالي و البنات يسألوني انتي مب خايفه اقولهم ليش انا شو سويت عشان اخاف قالوا العلوك قلت هييه والله تذكرت طااف خلها تتأدب هالمس

طبعا هيه ما قعدت عليه و عقب قامت من الكرسي و بعدين شكلها نست و قعدت عليه هههههه و طبع العلوك في ملاابسها و يوم شفته حسيت صدق ارتحت ههههههه

بعد مره كنا لاعبين بالواير مال الكمبيوتر مالها بحيث انه إذا شافته يكون عادي لكن في نفس الوقت الكمبيوتر ما يفتح

طبعا عاد هيه احتشرت الكمبيوتر ما يفتح

فراحت تجييب واحد يفهم في هالشغلاات رحنا نحن عدلنا الكمبيوتر خخخخخ فالريال شغل الكمبيوتر و اشتغل عاد هيه استغربت

ولا غير جيه نلعب بالساعه عشان نطلع من وقت و هذا من غير الاستهبال اللي نستهبل كل يوم فيها

الصراحه هالسنه بفتقد هالمقالب كلها في منو راح اسويها !!!

يلاا بروح ادرس